Ye raat tumhaari hai chamakte raho taaro,
woh aayen na aayen magar ummeed na haaro.
Shayad kisi manzil se koi qaafila aaye,
aashufta-saro subh talak yunhi pukaaro.
Din bhar toh chale ab zara dum le ke chalenge,
aey humsafro aaj yehin raat guzaaro.
Ye aalam-e-wehshat hai toh kuchh ho hi rahega,
manzil na sahi sar kisi deewar se maaro.
Ojhal hue jaate hain nigaahon se do aalam,
tum aaj kahan ho ghum-e-furqat ke sahaaro.
Khoya hai usey jis ka badal koi nahin hai,
ye baat magar kaun sune laakh pukaaro. !!
