Kyun mujh pe hua hai mehrbaan tu

Kyun mujh pe hua hai mehrbaan tu
Ek zarra-e-khaak aur kahaan tu

Main dhoop ki aadi ho chali thi
Kyun mujh pe bana hai sayebaan tu

Main teri zameen-e-nisf-e-shab hu
Taaron bhara mera aasmaan tu

Aise hi hamaari soch yekjaan
Main nutq tera, meri zabaan tu

Taiyyar hun main safar ko lekin
Kashti ka uThaaye baadbaan tu

Kitna bhi ho sakht mera lehjaa
Deeba-o-hareer-o-parniyaan tu

Ek aam ghareeb-e-shahr hun main
Kya sun ke karega daastaan tu

Pat_thar mein gulaab dekhta hai
Kis darja hai mujh se khushgumaan tu

Ab thora sa waqt rah gaya hai
Zaaye’ karun main na raayegaan tu

(Parveen Shakir)

Related Posts

Share this page:

0 Comments

Write a Comment

Your email address will not be published.
Required fields are marked *